MANIFIESTU 1 MAYU
CSI-CGT-SUATEA
Hai tiempu yá que los y les trabayadores venimos careciendo les consecuencies d’una cris de la que nun somos culpables. La situación vela cualisquiera: paru descomanáu y xorreciendo, sueldos que nun algamen a la fin de mes, cientos de miles de families na cai por embargu de vivienda, milenta de pensiones miserables, despidos y pieslles d’empreses comu cuentu risa y, a la fin, un emprobecimientu xabaz del conxuntu de les y los trabayadores.
Nos caberos 30 años, n’Asturies esmanteláronnos tol tapíu industrial, despidiéronnos, empeoraronnos les nueses condiciones de trabayu y salariu y desfarraparon decenes de miles de puestos de trabayu na siderurxa, los astilleros, el comerciu o la industria, demientres el mundu rural asturianu ta condergáu al desaniciu y el pieslle les mines averó a les Cuenques Mineres a una situación d’esmantelamientu xeneral incaltenible.
La especulación urbanística y financiera -y la usura la banca- dieren llugar a una cris que ta dexándonos na miseria, con unos altores de precariedá y esclusión social inmorales, fasta’l finxu de qu’una de cada cincu presones nel Estáu español vive per baxu l’umbral de la probitú.
Proyeutos alloriantes, comu’l “Muselón”, regasificadores, incineradores, llinies d’alta tensión, cementerios de CO2, AVE, autovíes, embalses o los planes urbanísticos, taracen el nuesu mediu ambiente y embárguennos el futuru.
La xorreciente privatización de los servicios públicos (comu sanidá, educación, Caxastur, servicios municipales…) ta esmantelando tola proteición social, demientres les sucesives lleis d’estranxería persiguen a les presones inmigrantes, faciéndoles responsables d’una situación de cris de la qu’otros son los braeros culpables.
Dícennos que too ello ye culpa de la cris, pero la realidá ye que ésta remánase comu disculpia. Disculpia pa esplotar, pa privatizar, pa precarizar, pa despedir, p’arruinar a los y les trabayadores, p’apertar ca vegada más la bota sobro los nuesos pescuezos, en resumen, pa facer que los ricos seyan más ricos y los probes más probes. N’Asturies llevamos en cris permanente los caberos 30 años. Hai xeneraciones enteres que lleven tola so vida nuna precariedá de la que nun son a salir.
Tan dexándonos na miseria demientres nos roben a mamplén. Especuladores y caradures repártense’l botín que sal del nuesu trabayu, al empar que les perres desapaecen peles alcantarielles de la corrupción, de los sueldos millonarios y de los beneficios bancarios y empresariales.
Nun podemos siguir asina. Tenemos de para-yos los pies. Hai de salir a la cai a demuesa-yos el nuesu descontentu. Tenemos de salir a lluchar escontra d’ellos, porque enxamás van danos un rispiu poles bones; enxamás van danos un rispiu si nun-yos lo arrancamos.
El prósimu 22 de mayu son les eleiciones municipales y autonómiques. Nun podemos consentir que seyan unes eleiciones más, comu si nun tuviere pasando un res. Los sindicatos CSI, SUATEA y CGT convocamos el sábadu 1 de mayu, en Xixón, una movilización escontra la política económica, llaboral y social del Gobiernu, que tendrá la so continuación el 14 de mayu n’Uviéu.
Col sálvese quien pueda, nada más se salven ellos