APTA ye una empresa propiedá de la ONCE y empobinada a ser un Centru Especial d’Emplegu pa presones discapacitaes. La ONCE vien de despedir a 151 d’estos y estes trabayadores, abandonándoles a la so suerte. A elles y a les sos families.
Naval-Xixón…, ¿pa qué vamos contavos?. Yá forma parte de la cultura y la hestoria de la llucha obrera asturiana. Agora, tornaron los tarrenos onde s’afincaba esta empresa, nun xigantescu chiringuitu de fritanga. Lo mesmo que pretenden facer cola minería y con tolos seutores productivos asturianos.
Queremos xunir estos dos puntos simbólicos con una Marcha de protesta. Queremos rescatar los nuesos drechos, queremos recuperar el nuesu futuru. Queremos defender los servicios públicos, queremos finar colos retayos sociales, queremos llevar a la cárcele a los banqueros que nos metieron nesta estafa que nomen cris, queremos un trabayu dignu pa toes y toos, queremos la Renta Básica de les iguales, queremos poner en Marcha a toles paraes y paraos.
Y queremos que participéis. Coles vueses reivindicaciones, colos vuesos problemes, coles vueses pancartes y coles vueses desixencies. Queremos xunir too eso nuna única llucha.
Pel camín de la “Marcha Negra”, vamos facer visibles toes estes reivindicaciones. Y vamos facelo al ritmu d’un “Camionetu Sound System”, con Rafa R. Valdés a cargu la música.