MANIFESTACIÓN DE CSI, CXT Y SUATEA EN XIXÓN, EL 22 DE MARZU
El prósimu xueves 22 de marzu, a les 19:00 h., na plaza L’Humedal, de Xixón, va entamar una manifestación convocada pola Corriente Sindical d’Izquierda, CXT y SUATEA “Contra la Reforma Llaboral, los recortes sociales y los ataques del capital”.
La realidá fala por sí mesma. Yá algamamos la cifra de 100.000 paraos y paraes n’Asturies y de 6 millones nel conxuntu l’Estáu español. Un millón y mediu de families, 35.000 d’élles asturianes, tienen a tolos sos miembros en paru; más de la metada los y les pensionistes cobren menos de 600 euros; el 50% de la mocedá ta nel paru; medio millón de families perdieren yá les sos viviendes y una de cada cuatru presones (el 25% la población) anda a la raya la probitú.
Pero, el Gobiernu del Estáu español yá anunció nueos recortes por valor d’unos 50.000 millones d’euros. Al empar, les sucesives reformes llaborales, los recortes sociales y les privatizaciones van facer xorrecer el paru y tornar el drechu a la Salú, la Educación y los Servicios Sociales nun privilexu al que namás van poder aceder aquéllos que puedan pagalu.
Pa la CSI, la CXT y SUATEA, la cabera Reforma Llaboral ta fecha al dictáu de la Patronal, porque pon fin a tolos drechos de los y les trabayadores, déxanos na indefensión dafechu y tórnanos en simples mercancíes en manes d’empresarios y especuladores.
En CSI, CXT y SUATEA, nun vamos aceutar denguna negociación sobro esta Reforma Llaboral y desiximos la so retirada darréu, asina comu del Acuerdu pol Emplegu y la Negociación Coleutiva, apautáu anteriormente por CCOO, UXT y la Patronal.
Refugamos, asinamesmo, del entreguismu de las burocracias sindicales de CCOO y UXT, que nun quisieron apurrir igües nel pasáu nin van apurriles nel futuru.
Pa les y los trabayadores, les coses namás van camudar cuandu entamemos un camín de movilización y defensa de los nuesos drechos na cai y nos centros de trabayu, con tolos medios que tengamos al nuesu alcance. A los y les trabayadores namás nos queda una igua: ganar na cai lo que nos quiten nos despachos.
