El prósimu xueves 9 de febreru, a les 19.30 H., en la plaza L’Humedal, de Xixón, va entamar una manifestación convocada pola Corriente Sindical d’Izquierda, CXT y SUATEA, col lema: “Esto nun ye una crisis, esto ye una estafa”.
La realidá fala por sí mesma. Bien céu vamos algamar 100.000 paraos y paraes n’Asturies y 6 millones nel conxuntu l’Estáu español. Un millón y mediu de families, 35.000 d’élles asturianes, tienen a tolos sos miembros en paru; más de la metada los y les pensionistes cobren menos de 600 euros; el 50% de la mocedá ta nel paru; medio millón de families perdieren yá les sos viviendes y una de cada cuatru presones (el 25% la población) anda a la raya la probitú.
Pero, el Gobiernu del Estáu español lleva espetaos unos 240.000 millones d’euros en bancos privaos y caxes, la banca privada algama los sos mayores beneficios nos caberos 15 años, el fraude fiscal de les grandes fortunes ye de 80.000 millones d’euros añales, la economía somorguiada mueve cuásique 250.000 millones d’euros, la Xunión Europea lleva gastaos 400.000 millones d’euros en rescatar a la banca privada y nos paradisos fiscales hai depositaos 6 BILLONES d’euros.
Al empar, les sucesives reformes llaborales, los recortes sociales y les privatizaciones nun van ser a otra cosa que facer xorrecer el paru y tornar el drechu a la Salú, la Educación y los Servicios Sociales nun privilexu al que namás van poder aceder aquéllos que puedan pagalu.
Demientres, la incapacidá de la clas política, cuandu non la corruición pura y dura, déxanos na indefensión dafechu y tórnanos en simples mercancíes nes manes d’especuladores, banqueros y empresarios ensin escrúpulos.
L’adelantu les elleiciones n’Asturies costitui un espectáculu vergoñosu y apareya un nuevu fracasu’l conxuntu los partíos políticos parllamentarios, que nun supieron o nun quisieron apurrir igües nel pasáu nin les van apurrir nel futuru. Los sos únicos intereses son partidistes y presonales.
Pa la CSI, llegó l’intre de que los y les trabayadores dexemos de confiar en quienes, fasta agora, empobinaron la política y la economía, porque los sos beneficios son la nuesa ruina.
Las cosas sólo van camudar cuandu los y les trabayadores entamemos un camín de movilización y de defensa de los nuesos drechos na cai y nos centros de trabayu, con tolos medios que tengamos al nuesu alcance. La CSI va facer tolo posible pa qu’esta manifestación seya’l primer pasu.